Geskryf deur Charlotte Fourie
Legkaarte, ‘n antieke vorm van vermaak en breinontwikkeling, strek terug tot so vroeg as die 3de eeu v.C. Hierdie speletjies, bekend vir hul vermoë om menslike vernuf en kennis te toets, daag spelers uit om stukke logies saam te voeg of uitmekaar te haal om ‘n bepaalde oplossing te vind. Een van die mees bekende moderne meganiese legkaarte is die Rubik’s Cube, ontwerp deur die Hongaarse argitek Ernő Rubik in 1974. Hierdie legkaarte word tipies ontwerp vir enkelspelers, waar die doelwit is om die beginsel agter die legkaart te ontdek, eerder as om per toeval by die korrekte oplossing uit te kom. Hierdie uitdagings word nie net vir vermaak geskep nie, maar spruit dikwels uit ernstige wiskundige of logiese probleme, waarvan die oplossing ‘n betekenisvolle bydrae tot wiskundige navorsing kan lewer.
In hierdie gees van ontdekking het Gimnasium Pretoria ‘n unieke geskenk aan die gaste van hul bekendstellingsgeleentheid op 21 Februarie 2024 uitgedeel: ‘n boks met drie 3D-meganiese houtlegkaarte. Elke legkaart – ‘n vierkant, ‘n driehoek en ‘n ster – verteenwoordig Gimnasium Pretoria se reis om ‘n unieke onderwysfilosofie saam te stel en dien ook as ‘n uitnodiging aan die gemeenskap om deel te neem aan die vorming van onderwys vir die toekoms.
Die keuse van legkaarte as geskenke is ‘n diepgaande metafoor vir die reis wat Gimnasium Pretoria sedert 2021 onderneem het. Oor die laaste drie jaar het hierdie instelling navorsing gedoen, meer as 20 internasionale skole besoek en met meer as 40 akademici wêreldwyd gekonsulteer. In samewerking met die fakulteit opvoedkunde van Akademia, talle onderwysers in Suid-Afrika en verskeie kenners in die onderwyssektor, het ons ‘n onderwysbenadering ontwikkel wat gebaseer is op beste praktyke en die strewe na opvoedkundige uitnemendheid. Soos die legkaarte, wat net suksesvol opgelos kan word deur die beginsels daaragter te ontdek, het Gimnasium Pretoria nie per toeval by ‘n onderwysantwoord vir die uitdagings van ons tyd gekom nie.
Alhoewel die geskenkboksie drie afsonderlike legkaarte bevat, weerspieël hulle ook saam ‘n harmonieuse samestelling, gerig deur eenderse beginsels. Hierdie legkaarte, elk uniek in vorm en struktuur, dien as metafore vir die veelvlakkige benadering van Gimnasium Pretoria tot onderwys – afsonderlik in hul kenmerke, maar saamgeweef deur ‘n gemeenskaplike doel en visie. Soos die legkaarte wat saam ‘n groter prentjie vorm, is Gimnasium Pretoria se onderwysfilosofie ‘n samesmelting van die goeie uit die verlede en die nodige vir die toekoms, verenig deur ‘n strewe na opvoedkundige uitnemendheid en innovasie.
Die bekendstelling van hierdie legkaarte aan die gemeenskap tydens die geleentheid is ‘n uitnodiging om saam met Gimnasium Pretoria op ‘n ontdekkingsreis te gaan. Dit daag die gemeenskap uit om nie net die legkaarte fisies saam te stel nie, maar om ook aktief deel te neem aan die skeppende vernuwing van onderwys, gebou op beproefde praktyke. Die doel is om saam ‘n toekoms te bou waarin die oogmerk van onderwys nie net die oordrag van akademiese kennis is nie, maar om kinders ook toe te rus met die nodige karakter, vaardighede en waardes vir ‘n snelveranderende wêreld.
Gimnasium Pretoria se keuse om die bekendstellingsgeleentheid op Moedertaaldag te hou, beklemtoon verder die belangrikheid van moedertaalonderrig in die behoud van kulturele identiteit en die bevordering van ‘n dieper begrip en verbintenis met ons erfenis. Deur onderwys te benader as ‘n legkaart wat saamgestel moet word, herinner Gimnasium Pretoria ons aan die krag van samewerking, innovasie en ‘n gedeelde visie vir die toekoms van onderwys.
Charlotte Fourie is ‘n voormalige onderwyser en tans ‘n projekbestuurder by die Solidariteit Skoleondersteuningsentrum (SOS).